Heite tips til bikinisesongen!

Mange studentar har sikkert to store bekymringar om dagen. Eksamen og bikinisesong. Begge deler kjem som kasta på oss, og desse to går ikkje nødvendigvis så godt i lag. Eg kan ikkje lova deg at du får kjælenamnet "The body" i sommar, men nokre enkle formtips skal eg likavel prøva meg på.



I eksamenstida har det kanskje vorte litt hektisk, og treninga har blitt nedprioritert. Ein føler seg kanskje litt "slapp i fisken", men det kan fort gjerast noko med. Når eksamen er vel overstått har du forhåpentlegvis både tid og overskot til å koma i gang med litt meir aktivitet. Veret er fint, kveldane er lange og motivasjonen er på topp. Dersom du har vore heilt inaktiv i eksamenstida kan det vera lurt med ein mjuk start, slik at ein ikkje brenn alt kruttet før juni er omme. Start gjerne med nokre løpeøkter. Det er effektivt både for kondisjon og feittforbrenning. Er du lur så vel du mjukt underlag, som sti og grus. Det er ofte meir motiverande enn lange asfaltvegar. Ha til dømes ei intervalløkt, og ein langtur i veka. Treningsveka bør også innehalda ei styrkeøkt. Dersom du ikkje har tilgang på treningssenter, så kan du trena styrke heima. Få inspirasjon her http://treningisit.blogspot.com/2011/12/basisstyrke.html. I tillegg sper du på med andre kjekke sommaraktivitetar, som strammar opp ein slapp eksamenskropp. Ei effektiv treningsveka som kan gjennomførast i eller etter eksamenstida kan sjå slik ut:

Måndag: Intervall 4x4min. Oppvarming 20-30 min. Løpeintervall i kupert terreng, 4 drag på 4 min kvar. 3 min aktiv pause mellom draga. Nedtrapping 10 min. Etterkvart aukar du til 5x4 min.

Tysdag: Fri eller ein roleg gå/joggetur.

Onsdag: Styrketrening. Varm opp, og tren effektiv styrke til syra tek deg. Det treng ikkje ta lang tid i det heile tatt.

Torsdag: Fri eller ein roleg gå/joggetur.

Fredag: Sykkeltur.

Laurdag: Sandvolleyball, badminton,bading eller noko anna kjekt.

Sundag: Langtur løping, eller rask gange. På ein fjelltopp, eller i marka. Ta med hunden din, naboen eller kjærasten. Alt frå 1 time til heile dagen.

Sånn går det for eksempel an å gjera det. Har ein det travelt så kan ein konsentrera seg om dei tre hovudøktene. Intervall, langtur og styrkeøkta. Så plottar du dei inn i veka di, der det passar best. Etterkvart som ein får betre tid utover sommaren kan ein plotta inn fleire og fleire treningsdagar. Dersom du i tillegg et meir jordbær enn sjokolade ligg du godt an til å smetta inn i bikinien. Uansett bør fokuset vera på kva som er best for helsa, og så får nesten kroppsformen berre vera som den er. Det viktigaste er at du føler deg vel, i bikini eller ei.

Kjersti